Եթե հաստատվի, որ Ֆրանսիան հանել է Ադրբեջանին սպառազինություն վաճառելու արգելքը, ապա հայկական կողմը կզբաղվի այդ հարցով
Եթե ադրբեջանական լրատվամիջոցներում տարածված տեղեկությունը, ըստ որի, Ֆրանսիան հանել է Ադրբեջանին պաշտպանական սպառազինություն վաճառելու արգելքը, հաստատվի, ապա հայկական կողմի համապատասխան մարմինները կզբաղվեն այդ հարցով:
Tert.am-ի հետ զրույցում այսպես ասաց ՀՀ պաշտպանության նախարարության մամուլի խոսակ Արծրուն Հովհաննիսյանը:
«Ամեն դեպքում, ադրբեջանական կողմի նմանաբնույթ հայտարարություններին այդքան էլ լուրջ չէի վերաբերվի, իսկ եթե այս տեղեկատվության հաստատում լինի Ֆրանսիայի պետական կառույցների կամ խոշոր ընկերությունների կողմից, ապա Հայաստանի համապատասխան մարմինները կզբաղվեն այդ հարցով», - ասաց նա:
Նշենք՝ Ֆրանսիան սահմանափակել է զենքի առքուվաճառքը ԼՂ հիմնախնդրի կողմերին: Սակայն, ավելի վաղ ադրբեջանական AzeriDefence-ին հղումով, «Интерфакс-Азербайджан»-ը գրել էր, թե պաշտոնական Փարիզը ֆրանսիական ընկերությունների համար վերացրել է Ադրբեջանին պաշտպանական նշանակության արտադրանք վաճառելու արգելքը: