Թյուրինգի քիմիական տեսությունը կարող է միլիոնավոր կյանքեր փրկել
Այս տեսության հիման վրա մշակված մեմբրանները կարող են աղի ջուր քաղցրահամ ջրի վերածել, հաղորդում է My Planet-ը:
Ալան Թյուրինգը հայտնի է նրանով, որ կարողացել է կոտրել գերմանական «Էնիգմա» գաղտնագրման մեքենայի կոդը՝ զգալի աջակցություն ապահովելով դաշնակից ուժերի համար: Սակայն միեւնույն ժամանակ Թյուրինգը զբաղվել է նաեւ կենսաքիմիայով: Նա աշխատություն էր հրապարակել, որը կարող է օգնել խմելու ջրի պակասի դեմ պայքարի գործում: Թյուրինգի տեսությունը հիմնված է այն փաստի վրա, որ կատալիզատորի եւ ինհիբիտորի միաժամանակյա օգտագործումը հնարավորություն է տալիս բարդ կառույցներ ստեղծել: Այս գործընթացը կոչվում է մորֆոգենեզ:
Չորս տարի առաջ տեսությունը հաստատվել էր նաեւ փորձարարական միջոցով: Չին մասնագետները պիպերազինի եւ տրիմեզոիլքլորիդի մոլեկուլներից բարակ պոլիմեր են ստեղծել, սակայն ավելացրել են պիպերազինի դիֆուզիայի սահմանափակիչ: Արդյունքում ծակոտկեն պոլիմեր է ստացվել, որը անցկացնում է ջուրը, սակայն պահում է աղը: Այժմ նյութը փորձարկում է անցնում՝ ապագայում խմելու ջրի զանգվածային արտադրության համար: