Բիրմինգհեմի օդանավակայանում ինքնաթիռները խուսափել են բախումից (տեսանյութ)
Կիրակի Անգլիայի Բիրմինգհեմի օդանավակայանում միջադեպ է տեղի ունեցել, որի տեսագրությունը հրապարակվել է համացանցում ու հայտնվել օգտատերերի ուշադրության կենտրոնում: Տեսանյութում ցուցադրվում է երկու ինքնաթիռների՝ բախումից խուսափելու պահը:
Ինչպես նշում է The Daily Mail-ը, ինքնաթիռներից մեկը պատրաստվում էր թռիչքի, իսկ մյուսը՝ վայրէջքի:
Աղբյուրի հաղորդմամբ՝ մի պահ ինքնաթիռների միջև առավելագույն հեռավորությունը մոտ 150 մետր է եղել:
«Աստված իմ, նայե՛ք: Որքա՜ն մոտիկ է», - բացականչել է գետնից տեղի ունեցածին հետևող ականատեսը:
Վայրէջք կատարող ինքնաթիռի ուղևորներից մեկի խոսքով՝ ամեն ինչ կարող էր ավելի վատ լինել:
«Կեցցե՛ մեր օդաչուն, ամեն ինչ կարող էր ավելի վատ լինել», - գրել է նա Twitter-ում:
Բիրմինգհեմի օդանավակայանի ներկայացուցիչներն իրենց հերթին նշել են, որ սա իրականում «վերահսկվող մանևր» էր:
«Մենք հասկանում ենք, թե ինչու կարող էր այս տեսանյութը մտահոգություն առաջացնել, սակայն սա վերահսկվող մանևր էր՝ ստանդարտ միջոցառումների շարքից: Ծանրաբեռնված օդանավակայաններում նման բան տեսնելն անսովոր չէ», - նշել է օդանավակայանի ներկայացուցիչը: