Թուրքական ԶՈւ-ն շարունակելու է գործել Իրաքի հյուսիսում՝ մինչև վերջին քուրդ զինյալի վերացումը․ երկրի ԳՇ պետ
Թուրքիայի ԶՈւ Գլխավոր շտաբի պետ Հուլուսի Աքարն այցելել է Իրաքին սահմանամերձ թուրքական Հաքքարի նահանգ, որտեղ քուրդ զինյալների դեմ նախաձեռնված մեծամասշտաբ ռազմական գործողություն է իրականացվում։
Ինչպես գրում է թուրքական «Միլլիյեթ» պարբերականը, Աքարը շեշտել է, որ Թուրքիան շարունակելու է իր գործողություններն Իրաքի հյուսիսում՝ պայքարելով «Քրդստանի աշխատավորական կուսակցություն» խմբավորման դեմ։
«Մենք վճռականորեն շարունակելու ենք սկսված պայքարը՝ մինչև վերջին ահաբեկչին չեզոքացնելը», - ասել է Աքարը։
Նշենք, որ օրերս Հաքքարիում քուրդ զինյալների ու թուրքական ԶՈւ-ի միջև սրված բախումների ժամանակ մահացել էր 3 թուրք զինվոր։
ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն:
Թուրք-քրդական հարաբերությունների սրման հերթական փուլը սկսվել է 2015-ի ամռանը:
Կազմակերպությունը 1978 թվականին հիմնադրել է Աբդուլլահ Օջալանը: