Հրապարակվել է վատթարագույն ճանապարհներն ունեցող երկրների ցուցակը
Հրապարակվել է լավագույն եւ վատթարագույն ճանապարհներն ունեցող աշխարհի երկրների վարկանիշային ցուցակն ըստ «Համաշխարհային մրցունակության ինդեքս 2017-2018»–ի, փոխանցում է «ՌԻԱ Նովոստի»–ն։
Ցուցակում են հայտնվել աշխարհի 137 երկրներ։ Ճանապարհների որակը գնահատվել է 1-7 սանդղակով, ընդ որում՝ ոչ մի պետություն չի հավաքել ամենաբարձր միավորը։
Ամենավատ ճանապարհները գրանցվել են Մավրիտանիայում, որը ստացել է երկու միավոր։ Նրան հետեւում են Կոնգոյի Դեմոկրատական Հանրապետությունը եւ Հաիթին՝ հավաքելով 2.1 միավոր։ 4-րդ եւ 5-րդ տեղը բաժին է ընկել Մադագասկարին ու Գվինեային՝ երկու երկրների ճանապարհները գնահատվել են 2.2 միավոր։ Ապա հաջորդում են Եմենը (2.3 միավոր), Պարագվայը (2.4 միավոր), Ուկրաինան (2.4 միավոր), Մոզամբիկը (2.5 միավոր) եւ Մոլդովան (2.5 միավոր)։
Լավագույն ճանապարհները ունեցող երկիրն այս վարկանիշում ճանաչվել է Արաբական Միացյալ Էմիրությունները (6.4 միավոր), Սինգապուրը (6.3 միավոր), Շվեյցարիան (6.3 միավոր), Հոնկոնգը (6.2 միավոր), Նիդեռլանդները (6.1 միավոր), Ճապոնիան (6.1 միավոր), Ֆրանսիան (վեց միավոր), Պորտուգալիան (վեց միավոր), Ավստրիան (վեց միավոր) եւ Միացյալ Նահանգները (5.7 միավոր):