Ուզբեկստանը մտադիր է էլեկտրամոբիլներ ու ինքնակառավարվող մեքենաներ արտադրել
Ուզբեկական «Ուզավտոսանոատ» ընկերությունը քննարկում է էլեկտրամոբիլների արտադրություն սկսելու հարցը: Դրա հետ մեկտեղ՝ երկրում նախատեսվում է համապատասխան ենթակառուցվածքներ ստեղծել: Այդ մասին հայտնել է «Ուզավտոսանոատ»-ի խորհրդի նախագահ Ումիջան Սալիմովը, տեղեկացնում է «Sputnik Ուզբեկստան»-ը:
Ընկերության ղեկավարի խոսքով՝ սա նոր ուղղություն է Ուզբեկստանի ավտոարդյունաբերության համար:
«Այժմ մշակվում է էլեկտրամոբիլների արտադրության կոնցեպցիան: Փաստաթուղթը պատրաստ կլինի երկու ամսվա ընթացքում»,- նշել է նա:
Սալիմովը հավելել է, որ Տաշքենդում սկսել են նախագծել նաև առաջին ինքնակառավարվող ավտոմեքենան, և նախագիծը ֆինանսավորում է «Ուզավտոսանոատ» ընկերությունը՝ երկու ռուսական գործընկերների հետ համատեղ:
«Սա շատ բարդ նախագիծ է, սակայն մենք նաև այս ուղղությամբ ենք սկսել աշխատել»,-ասել է Սալիմովը: