Բողոքի ակցիա Թբիլիսիում. մասնակիցները վտարել են վարչապետին եւ պահանջել են կառավարության հրաժարականը (Տեսանյութ)
Թբիլիսիի խորհրդարանի շենքի դիմաց հավաքված բազմահազարանոց հանրահավաքի մասնակիցները պահանջել են կառավարության հրաժարականը: Ակցիայի կազմակերպիչները իրենց ելույթներում Վրաստանի նախագահ Գեորգի Մարգվելաշվիլիին կոչ են արել միանալ բողոքի ակցիային:
Գրուզիա օնլայնը հաղորդում է, որ ակցիայի մասնակիցները վարչապետին հնարավորություն չեն տվել ավարտել ելույթը, որից հետո Գեորգի Կվիրիկաշվիլին հեռացել է տարածքից:
Բողոքի ակցիայի մասնակիցները գոռացել են «Հեռացիր»: Նովոստի Գրուզիան հաղորդում է, որ վարչապետի վրա շշեր են նետել եւ պահակախումբը նրան հեռացրել է հրապարակից:
Ավելի վաղ ակցիայի մասնակիցները գլխավոր դատախազ Իրակլի Շոթաձեի հրաժարականից հետո պահաջել են նրան քրեական պատասխանատվության ենթարկել եւ իրավապահ եւ դատական համակարգերի վերակազմակերպում իրականացնել:
Ակցիայի մասնակիցները իշխանություններին 2 ժամ են տվել պահանջների կատարման համար, հակառակ դեպքում նրանք սպառնացել են կտրուկ գործողություններով: 22:00-ին այդ վերջնագրի ժամկետը լրացավ: