NASA-ն Մարս կուղարկի ոչ մեծ ուղղաթիռ (Տեսանյութ)
NASA-ն մտադիր է 2020 թվականի հուլիսին Մարսի հետազոտման հերթական առաքելության շրջանակում մոլորակ ուղարկել ոչ մեծ ուղղաթիռ: Այս մասին նշված է ուրբաթ տարածված հայտարարության մեջ, փոխանցում է ՏԱՍՍ-ը:
Ենթադրվում է, որ այս թռչող սարքը, որի մշակումները սկսվել են դեռեւս 2013-ին, մոլորակ հասցվելուց հետո մակերեւույթին մի քանի թեստային թռիչքներ կկատարի նոր մարսագնացի հետ, սակայն մեխանիզմի համար դեռեւս գիտական խնդիրներ չեն դրվել: «NASA-ն հայտնագործությունների մեծ պատմություն ունի: Այլ մոլորակի երկնքում ուղղաթիռի թռիչքի իրականացումն ուղղակի կախարդական է: Մարսում այս ուղղաթիռը մեր գիտության ապագայի, մեր հայտնագործությունների եւ Կարմիր մոլորակի հետազոտությունների առաքելությունների համար մեծ պոտենցիալ ունի»,- ասել է NASA-ի նոր տնօրեն Ջեյմս Բրայդենսթայնը:
Գերատեսչությունից նշել են, որ թռչող սարքի փորձարկումների ծրագրի ընթացքում, որը մյուս սարքավորումների հետ Մարս է հասնելու 2021 թվականի փետրվարին, այն առնվազն 5 թռիչք կիրականացնի՝ մինչեւ 90 վայրկյան տեւողությամբ: Առաջին նման թռիչքի շրջանակում սարքը օդ կբարձրանա 3 մետր եւ այս բարձրության վրա պետք է մնա 30 վայրկյան:
Լուրեր Հայաստանից - NEWS.am