Թուրքիայում հաստատել են Ռուսաստանից C-400 գնելու մտադրությունը
Թուրքիայի պաշտպանական արդյունաբերության քարտուղարության խորհրդական Իսմաիլ Դեմիրը հայտարարել է, որ Ռուսաստանը Թուրքիային կտրամադրի զենիթա-հրթիռային C-400 համակարգերը պայմանավորված ժամկետներում՝ 2019 թվականի հուլիսին,- հաղորդում է Anadolu գործակալությունը:
«Համաձայնագրի շրջանակները որոշված են, և թուրքական կողմը բարձրաձայնել է իր պահանջները: Մի շարք պահանջներ գոյություն ունեն: Դրանց մի մասը հայտնի է հանրությանը:
Այս պահանջները կատարելու հետ կապված որևէ խնդիր չկա: Համաձայնագրի իրականացումը շարունակվում է նախնական պայմանավորվածությունների համաձայն»,- ասել է Դեմիրը:
Նա մեկնաբանել է նաև հնարավոր պատժամիջոցների վերաբերյալ տեղեկությունները՝ կապված C-400-ի ձեռքբերման հետ:
Նրա խոսքերով՝ Անկարան տեղյակ է նման հաղորդագրությունների մասին, սակայն Թուրքիայի և Ռուսաստանի առաջնորդները հստակ որոշում են կայացրել:
«Ակնկալում ենք, որ Թուրքիայի դաշնակիցները չեն խառնի մի հարցը մյուսի հետ, և կգնահատեն իրավիճակը՝ հիմնվելով առողջ բանականության վրա»,- ասել է նա: