Սերժ Սարգսյանը հրաժարվել է պետական առանձնատան նկատմամբ սեփականության իրավունքից
Նորընտիր վարչապետ Սերժ Սարգսյանը հրաժարվել է կառավարության կողմից շաբաթներ առաջ իրեն նվիրված պետական առանձնատան նկատմամբ սեփականության իրավունքից:Այդ մասին Սարգսյանը հայտարարեց գործադիրի այսօրվա նիստում:
Իր խոսքում, Սարգսյանն ընդգծեց՝ այդ առանձնատանը չեն բնակվել հանրապետության ո՛չ առաջին, ո՛չ էլ երկրորդ նախագահները, իսկ իրեն առանձնատուն նվիրելու որոշման փաստարկները անվանեց «տրամաբանական» և հիշեցրեց, որ պաշտպանել է կառավարության այդ որոշումը:
«Շատ շնորհակալ եմ այդպիսի որոշման համար, բայց այսօր ես եմ կառավարության ղեկավարը և ես եմ նստած նիստը անցկացնողի բազկաթոռին: Սա այլ իրավիճակ է: Ուստի ես որոշում եմ կայացրել հրաժարվել այդ տան նկատմամբ սեփականության իրավունքից հենց առաջին նիստի ժամանակ, որը ես կանցկացնեմ: Այսինքն՝ այսօր», - նշեց Սերժ Սարգսյանը՝ հավելելով․ - «Հիմա Հանրապետության երրորդ նախագահի բնակարանային խնդիրը լուծելու պահը չէ»