Ստեփան Մարգարյան. «Ժողովուրդը պահանջում է արդարություն եւ փոփոխություններ»
Հարցազրույց «Այլընտրանքային նախագծեր խմբի» անդամ Ստեփան Մարգարյանի հետ:
- Պրն Մարգարյան, մինչեւ Սերժ Սարգսյանի պաշտոնավարման ավարտը հաշված օրեր են մնացել, որից հետո երկիրն ամբողջովին անցնում է կառավարման խորհրդարանական համակարգի: Խորհրդարանն ընտրելու է վարչապետ, ձեւավորվելու է կառավարություն: Որոշ ուժեր արդեն իսկ բողոքի գործողություններ են իրականացնում, շեշտելով, որ Սերժ Սարգսյանը չպետք է զբաղեցնի վարչապետի պաշտոնը: Ձեր կարծիքով առաջիկայում ինչ զարգացումներ են սպասվում:
- Բողոքի գործողություններից արդեն տեղյակ ենք, սպասելի է նաեւ, որ առաջիկայում դրանք կշարունակվեն: Դեմ լինելը եւ դրա արտահայտման գործողությունները ցանկացած քաղաքական ուժի իրավունքն է: Ես ցանկանում եմ շեշտել, որ նոր Սահմանադրությամբ, վարչապետի առաջադրման իրավունքը պատկանում է խորհրդարանական մեծամասնությանը: Ավելին, վարչապետին ընտրելու է հենց խորհրդարանը: Իհարկե, դեռ ՀՀԿ-ն պաշտոնապես չի հայտարարել, թե ում թեկնածությունն է առաջադրելու, սակայն նաեւ իրավական որեւէ խոչընդոտ չկա, որ առաջադրվի Սերժ Սարգսյանի թեկնածությունը: Այսօրվա խորհրդարանական մեծամասնության այդ իրավունքը ձեւավորվել է ընտրությունների արդյունքում: Իսկ թե ինչ զարգացումներ կլինեն առաջիկայում, ապա կարծում եմ, որ խորհրդարանում քվեարկության ժամանակ անակնկալներ չեն լինի, իսկ բողոքի գործողությյունների զանգվածայնությանը, անկեղծ ասած, չեմ հավատում:
- Չե՞ք կարծում, որ ժողովուրդը դժգոհ է առկա իրավիճակից եւ կառավարող ուժից:
Ժողովուրդն ընդհանրապես դժգոհ է քաղաքական վերնախավից, այդ թվում ընդդիմադիր ուժերից: Մենք գործ ունենք հիասթափության հետ: Դժգոհության աղբյուրը ոչ միայն անձնական է, այլ համակարգային: Հասարակությունը, անշուշտ, սպասում է փոփոխությունների, սպասում է արմատական բարեփոծումների, որի արդյունքում կբարելավվի իր կենսամակարդակը: Միայն անձերով պայմանավորված փոփոխությունները որպես կանոն արդյունավետ չեն լինում:
- Իսկ ինչ եք դուք առաջարկում:
Ես կարծում եմ, որ քաղաքական ուժերն ունեն լուծելու շատ լուրջ խնդիր՝ երկրում փոփոխությունների, եւ դեպի զարգացմանն ուղղված հստակ օրակարգի ձեւավորումը: Մենք՝ «Այլընտրանքային նախագծեր խումբը» իր գործունեությունը սկսելու պահից անդադար խոսում է այդ օրակարգի մասին: Ի թիվս այլ վերլուծությունների եւ առաջարկությունների, օրերս մենք նաեւ նշեցինք այն տասներկու կետերը, որոնք անհրաժեշտ են առաջիկա փոփոխությունների եւ զարգացման համար: Իհարկե, կարելի է թվարկել նաեւ հարյուր տասներկու կետ, սակայն մեր կողմից առանձնացրած կետերն այն կարեւոր ուղղություններն են, որոնց կատարումը ոչ միայն կհամախմբի հասարակությանը, այլեւ կլեգիտիմացնի այդ փոփոխություններն իրականացնող ուժին: Երկրին անհրաժեշտ են լուրջ փոփոխություններ, թե ինչպես դրանք կիրականացվեն, այս պահին ես չեմ կարող ասել: Մենք կողմ ենք սահուն եւ ճշգրիտ հաշվարկված փոփոխությունների:
-Ավելի մանրամասնորեն կանդարդառնա՞ք ձեր առաջարկներին:
- Ինչո՞ւ՝ ոչ: Օրինակ, մենք առաջարկում ենք առաջին հերթին փոխել հանրային սպասումները, տրամադրությունները: Սա շատ կարեւոր է: Առանց այսօրվա ծույլ եւ հոգնած մթնոլորտը կոտրելու մենք առաջ չեն շարժվի: Ամենակարեւորը՝ մարդկանց պետք է տալ աշխատելու, գործելու ազատություն, որի իրականացման դեպքում կնպաստենք նաեւ արտագաղթի վերացմանը: Փոքր եւ միջին բիզնեսին անպայման պետք է տալ աշխատելու աննախադեպ հնարավորություն: Անպայման անհրաժեշտ է հասնել արդարության մթնոլորի հաստատմանը, առանց որի խոսել զարգացման մասին սուտ կլինի: Վստահ ենք, որ պետք է իրականացվի նաեւ կառավարման ապակենտրոնացում: Անհրաժեշտ եւ կարեւոր ենք համարում բանակում սկսված բարեփոխումների շարունակումը եւ կատարելագործումը: Կարեւորում ենք նաեւ մարզերի զարգացումը: Երեւանը պետք է բեռնաթափվի: Հայաստանը միայն Երեւանը չէ: Եւ վերջապես չպետք է ամաչենք կիրառելու, օգտագործելու համար այլ երկրների հաջողված բարեփոխումները, ծրագրերը: Մենք հրապարակել ենք այդ կետերը, ցանկության դեպքում կարող եք դրանց առավել մանրամասնորեն ծանոթանալ:
- Դուք վստա՞հ եք, որ կառավարող ուժը հաշվի կառնի ձեր առաջարկները:
«Այլընտրանքային նախագծեր խումբը» գտնում է, որ հասարակական-քաղաքական ուժերը պետք է ձեւավորեն այնպիսի օրակարգ, որը կհանգեցնի տարբեր բնագավառներում իրական վերնախավի՝ էլիտայի ձեւավորմանը, որը կունենա երկրի զարգացման վերաբերյալ միասնական մոտեցում կամ պատկերացում: Կլինի քաղաքական, տնտեսական, թե մշակույթային էլիտա, որոնց պատկերացումներն ընդհանուր կլինեն երկրի զարգացման համար:
- Չեք կարծում, որ կառավորության ձեւավորումից հետո լճացումը կխորանա, քանի որ նրանք, կարծես շատ հեշտ հաղթանակների հասան:
Լճացման խորացումը, անշուշտ, կործանարար կլինի Հայաստանի համար: Ես խոսում եմ այնպիսի ընդհանրացված օրակարգի մասին, որը երկրում կփոխի բարոյահոգեբանական մթնոլորտը: Առաջիկայում ձեւավորվելիք կառավարությունը եւ վարչապետը կառավարման նոր համակարգում մտնում են շատ լուրջ պատասխանատվության տակ: Երկրին անհրաժեշտ են արմատական բարեփոխումներ, ընդ որում, ոչ միայն տնտեսության ոլորտում, առանց որի զարգացման, առաջընթացի, հաջողությունների մասին խոսք անգամ լինել չի կարող:
Top-News.am