Ինչ են քննարկելու Ադրբեջանի, Թուրքիայի, Իրանի ու Վրաստանի ԱԳ նախարարները
Ադրբեջանը, Թուրքիան, Իրանն ու Վրաստանն այսօր պատրաստվում են լայն համագործակցության վերաբերյալ «ճանապարհային քարտեզ» ստորագրել։ Այս մասին, ինչպես հայտնում է ադրբեջանական «Թրենդ» գործակալությունը, Բաքվի VI-րդ համաշխարհային ֆորումի շրջանակում հայտարարել է Թուրքիայի արտգործնախարար Մևլութ Չավուշօղլուն:
«Մենք աշխատել ենք ընդհանուր «ճանապարհային քարտեզի» վրա, և այսօր նախատեսում ենք ստորագրել այն: Այն ներառում է տարբեր ոլորտներ՝ այդ թվում տրանսպորտի, կապի, էներգետիկայի, տարածաշրջանային հարցերի, տնտեսության, առևտրի ու մաքսային հարցերի հետ կապված նախագծեր», - ասել է Չավուշօղլուն:
Նրա խոսքով՝ չորս երկրների ԱԳՆ ղեկավարներն առաջին անգամ են հանդիպում նման ձևաչափով:
Ըստ Չավուշօղլուի՝ կողմերը շատ թեմաներ ունեն քննարկելու, որոնց թվում է Բաքու-Թբիլիսի-Կարս երկաթգծի նախագծին Իրանի մասնակցությունը, էներգետիկ նախագծեր և այլն։