Ռուս ընտրողները կանգնած են դժվար ընտրության առաջ՝ Վլադիմիր Պուտի՞ն, թե՞ Վլադիմիր Պուտին
Այս թեմայով
- Ռուս ընդդիմադիր գործիչ Ալեքսեյ Նավալնին բանտում մահացել է
- Սիրիայում ՌԴ–ի հետ հակասությունը C-400–ների վրա չի ազդի
- Ռուսաստանը Թուրքիային կոչ է անում խստորեն կատարել Իդլիբի վերաբերյալ Սոչիի համաձայնագիրը․ Լավրով
- Ռուսաստանի հետ համատեղ հերթապահությունը կսկսվի մոտ ժամանակներս.Թուրքիայի պաշտպանության նախարար
Ռուսաստանում մարտի 18-ին կայանալիք նախագահական ընտրություններում այլ արդյունքների հեռանկար, քան Վլադիմիր Պուտինի իշխանության ևս 6 տարին է, չի երևում: Չնայած նրան, որ ընտրությունների արդյունքները կասկած չեն առաջացնում, ՌԴ նախագահը ջանքեր է գործադրում մարդկանց քաղաքականությամբ հետաքրքրվածությունը մեծացնելու ուղղությամբ, գրում է The Independent-ը:
Լրատվամիջոցը գրում է, որ Պուտինն իր նախընտրական քարոզարշավն անցկացնում է միայն իր իսկ պայմաններով: Նա սահմանափակել է արտաքին աշխարհի հետ շփումները, հանրային վայրերում հազվադեպ է հայտնվում, չի մասնակցում հեռուստատեսային բանավեճերին և ռուսական լրատվամիջոցներին հարցազրույց տալու փոխարեն՝ վավերագրական ֆիլմերում նկարահանվել է նախընտրում: Նա նախընտրական քարոզարշավի ժամանակ կարողացել է նաև խուսափել քաղաքականության մասին իրական քննարկումներից:
Ժողովրդին ուղղված նրա ուղերձից միակ հստակ տեսլականը, որ երկրի բնակիչները կարող էին ստանալ, այն էր, որ իրենց ապագան լինելու է «միջուկային և ռազմականացված»:
Ռուսները դեռ պետք է դադարեն Վլադիմիր Պուտինին սիրահարված լինել: Նա, իշխանության գալով, կարողացավ ամրապնդել իրավիճակը ծանր տնտեսական ճգնաժամից դուրս եկող երկրում և շատ քաղաքացիների վերադարձրեց իրենց աշխատանքն ու արժանապատվությունը: Միևնույն ժամանակ, նա խրախուսեց իր երկրի բնակիչներին իրենց «քթները չմտցնել մրցակցային քաղաքականության մեջ» և կենտրոնանալ իրենց կարիերաների և գումար վաստակելու վրա: Բայց երկու տասնամյակ անտարբերություն սերմանելուց հետո ՌԴ նախագահը խնդրի է բախվել: Այժմ նրան պետք է, որ բնակիչները վերագտնեն քաղաքականությամբ իրենց հետաքրքրվածությունը:
Դա անհրաժեշտ է ոչ թե նրա ընտրվելը երաշխավորելու համար, այլ վստահության ծանրակշիռ քվե ստանալու համար: Դա, համաձայն բազմաթիվ աղբյուրների, նշանակում է 70 տոկոս ընտրական մասնակցության դեպքում մոտ 70 տոկոս ձայն:
Այդ նպատակով Պուտինի թիմը փորձել է մրցակցության և ինտրիգների տպավորություն ստեղծել: Նրանք կառավարելի «ընդդիմությունը» համալրել են նոր դեմքերով: Դրանցից մեկը կոմունիստների թեկնածու Պավել Գրուդինինն է, մյուսը՝ Քսենիա Սոբչակը, որը, չնայած մեղադրանքներին, պնդում է, որ չի համաձայնեցրել իր որոշումը Կրեմլի հետ: Նախագահի թեկնածու առաջադրվելու նրա որոշումը մասնավորապես ծաղրի է արժանացել Պուտինի առաջատար քննադատներից մեկի՝ Ալեքսեյ Նավալնիի կողմից, ում արգելել են մասնակցել նախագահական ընտրություններին: Իրապատում շոուների նախկին աստղ Սոբչակը Կրեմլին տվել է այն, ինչ նրան անհրաժեշտ էր՝ շոուներ: Փետրվարի 27-ին, մասնավորապես, նա կյանք հաղորդեց ձանձրալի հեռուստատեսային բանավեճերին՝ ջուր շփելով մեկ այլ թեկնածու՝ Վլադիմիր Ժիրինովսկիի վրա: Այս քայլը հավանաբար գոհացրել է նախագահական աշխատակազմին. «բանավեճը» դիտել է ռեկորդային թվով հանդիսատես:
Ընտրություններից մեկ շաբաթ առաջ ամբողջ թափով ընթանում է ընտրողների մասնակցության թիվը մեծացնելու գործողությունը: Որոշ շրջաններում առաջարկվելու է քաղցկեղի անվճար ստուգում, որոնց արդյունքները հնարավոր կլինի ստանալ ընտրությունների օրը տեղի դպրոցներում, որոնք գործելու են որպես ընտրատեղամասեր:
Մեկ այլ ծրագրով փորձ է արվելու մոբիլիզացնել երիտասարդ ընտրողներին՝ լավագույն «ընտրությունների սելֆի»-ի համար սմարթֆոններ առաջարկելով: Ընտրողների մասնակցությունն ապահովելու հիմնական միջոցը լինելու են մեխանիկական միջամտությունները, ինչպես, օրինակ, պարտադրված քվեարկությունը Կրեմլի վերահսկողության տակ գտնվող հաստատություններում՝ պետական կորպորացիաներում, համալսարաններում, հիվանդանոցներում:
Ռուսաստանի իշխանությունների առաջ մեկ խնդիր է դրված՝ ինչպես հասնել մասնակցության թիրախային թվին՝ առանց խոշոր սկանդալի: Լրատվամիջոցը նշում է, որ «Լևադա կենտրոն»-ի անցկացրած հարցման համաձայն՝ բնակչության 30 տոկոսից քիչն է մտադիր մասնակցել ընտրություններին: