Ալիեւը բացատրել է իր կնոջ նշանակումը փոխնախագահի պաշտոնում
Մեհրիբան Ալիեւայի նշանակումը Ադրբեջանի փոխնախագահի պաշտոնում պայմանավորված է նրա հաջողություններով եւ հասարակական–քաղաքական, մշակութային եւ միջազգային ոլորտներում նրա էֆեկտիվ գործունեությամբ,– հայտարարել է նրա ամուսինը, Ադրբեջանի նախագահ՝ Իլհամ Ալիեւը։
«Երկար տարիներ Ալիեւան լուրջ դերակատարում ունի հասարակական քաղաքական, մշակութային, միջազգային գործունեության ոլորտներում։ Նա բազմակողմանի եւ հաջող գործունեություն է իրականացնում։ Հենց այդ գործոններով էլ ես առաջնորդվել եմ, ընդունելով՝ նրան Ադրբեջանի առաջին փոխնախագահի պաշտոնում նշանակելու որոշումը»,– երեքշաբթի օրը, Անվտանգության խորհրդի նիստում ասել է Ալիեւը՝ ներկայացնելով Ալիեւային առաջին փոխնախագահի պաշտոնում։
Նա նաեւ ավելացրել է, որ Ալիեվան արհեստավարժ է, փորձառու եւ սկզբունքային մարդ, հումանիստ։
Նախագահը հիշեցրել է, որ Ալիեւան նաեւ Ադրբեջանի իշխող կուսակցության ղեկավարի տեղակալն է, որի անդամների թիվը հասնում է մոտ 700հազարի։
Նրա խոսքերով, Ալիեւան շատ բան է անում միջազգային հարթակում Ադրբեջանի առաջխաղացման եւ նրա մշակույթի քարոզչության համար։ «Նա նաեւ ղեկավարել է այնպիսի խոշոր միջազգային միջոցառումների կազմակերպչական կոմիտեները, ինչպիսիք են Եվրատեսիլը՝ 2012-ին, Առաջին Եվրոպական խաղերը՝ 2015-ին։ Բոլոր այս միջոցառումները հրաշալի են կազմակերպված եղել։ Ալիեւան ղեկավարում է IV Իսլամական խաղերի կազմակերպչական կոմիտեն (տեղի են ունենալու 2017-ի մարտին), եւ ես չեմ կասկածում, որ այս խաղերը եւս կկազմակերպվեն բարձր մակարդակով»,– նշել է նախագահը։