Թեհրանում ոստիկանությունը 300 ցուցարար է ձերբակալել
Իրանի ոստիկանական ուժերը 300 ցուցարար են ձերբակալել Թեհրանում սուֆիզմի հետևորդների հետ բախումներից հետո, որոնց հետևանքով անվտանգության ուժերի հինգ անդամ է սպանվել: Այդ մասին հայտնում է Tasnim լրատվական գործակալությունը՝ վկայակոչելով ոստիկանության խոսնակին:
Նշվում է, որ իրավապահ մարմինները գործողություն են իրականացրել Թեհրանի հյուսիսում գտնվող Փասդարան փողոցում հանձնվելու համար մինչև գիշերվա ժամը 4-ը տրամադրված վերջնաժամկետի լրանալուց հետո:
Նշվում է, որ սուֆիզմի հետևորդների կողմից իրականացված հարձակումների հետևանքով սպանվել է իրավապահ ուժերի երեք և մոբիլիզացիոն ուժերի երկու անդամ, վիրավորվել է 30 ոստիկան:
Ցուցարարները հավաքվել էին ոստիկանական բաժանմունքի առջև և պահանջում էին իրենց հավատակից անդամների ազատ արձակումը:
Սոցցանցերում տարածված տեսանյութերից մեկում երևում է, թե ինչպես է սպիտակ ավտոբուսն ընթացել մոտ 40 ոստիկանների խմբի ուղղությամբ՝ նրանց վրաերթի ենթարկելով:
Միջազգային իրավապաշտպան խմբերն Իրանին մեղադրել են շարժման անդամների նկատմամբ տարիներ շարունակ իրականացվող հետապնդումների համար: