Տարոն Մարգարյանը ներողություն չխնդրեց, բայց զգուշացրեց
Երեւանի ավագանու նիստը մոտ մեկ ժամ ընդմիջվելուց հետո շարունակվեց: Քաղաքապետ Տարոն Մարգարյանը հայտարարեց, որ եթե Երկիր ծիրանի խմբակցության անդամները հաջորդ անգամ էլ փորձեն խաթարել նիստի բնականոն ընթացքը, ապա կհեռացվեն դահլիճից: Տարոն Մարգարյանը ներողություն չխնդրեց Երկիր ծիրանի խմբակցության անդամներից, երեւանցիներից այն բանի համար, որ ՀՀԿ-ականները ծեծի են ենթարկել կանանց: ԵԼՔ խմբակցության ղեկավար Դավիթ Խաժակյանը ձայն խնդրեց եւ Տարոն Մարգարյանի փոխարեն ներողություն խնդրեց մայրաքաղաքի բնակիչներից կատարվածի համար, սակայն ակնարկեց, որ Երկիր ծիրանի խմբակցությունն է միջադեպի պատճառը դարձել:
Երկիր ծիրանի խմբակցության անդամներ Զարուհի Փոստանջյանը, Մարինա Խաչատրյանը եւ Սոնա Աղեկյանը մասնակցում են նիստին: Աղեկյանը լրագրողների հետ զրույցում ասաց, որ ինքը հարվածներ է ստացել:
Տարոն Մարգարյանի որոշմամբ շտապօգնության աշխատակիցները մնացին նիստերի դահլիճում, իսկ ոստիկանները հերթապահում են դահլիճից դուրս:
Հիշեցնենք, այսօր Երեւանի ավագանու նիստը սկանդալային ընթացք ստացավ: Երկիր Ծիրանիի անդամները կոյուղաջրեր լցրեցին նիստերի դահլիճի հատակին, քաղաքապետ Տարոն Մարգարյանին ասելով, որ Նուբարաշեն թաղամասի բնակիչներից նվեր են բերել նրան: Նուբարաշենցիները երեկ փակել էին դեպի «Նուբարաշեն» ՔԿՀ տանող ճանապարհը, բողոքելով իրենց տարածքում տարածված գարշահոտից: Բանն այն է, որ քրեակատարողական հիմնարկի կոյուղու խողովակները խցանված են, ինչի պատճառով կոյուղաջրերը լցվում են հարակից տարածք:
Նուբարաշենից բերված կոյուղաջրերն ավագանու նիստերի դահլիճի հատակին լցնելուց հետո մի շարք ՀՀԿ-ականները հարձակվեցին Երկիր Ծիրանիի կանանց վրա, ապտակեցին, քաշքշեցին նրանց: