Մենք պատրաստ ենք հարմար գներով գազ վաճառել Հայաստանին․ Իրանի դեսպան
Այս պահի դրությամբ էներգետիկայի ոլորտում շատ լավ համագործակցություն ենք ձևավորել Հայաստանի հետ:
Այս մասին լրագրողների հետ զրույցում պատասխանելով Tert.am-ի հարցմանը, թե Հայաստան-Իրան էներգետիկ համագործակցություններից որոնք են այս տարի իրականացման փուլին հասնելու, ասաց ՀՀ-ում Իրանի Իսլամական Հանրապետության արտակարգ և լիազոր դեսպան Սեյեդ Քազեմ Սաջադին:
«Վերջերս երկարաձգվեց միջկառավարական պայմանագիրը, որը վերաբերում էր գազ-էլեկտրաէներգիայի դիմաց համաձայնությանը, և որի շրջանակներում պետք է երրորդ էլեկտրահաղորդման գիծը շահագործման հանձնվի։ Հուսով եմ, որ մոտ ապագայում ականատեսը կլինենք այդ իրադարձության»,- նշեց նա։
Դեսպանը հիշատակեց նաև՝ պայմանավորվածության համաձայն Իրան արտահանվող էներգետիկայի դիմաց Հայաստանը գազ կստանա:
Ըստ դեսպանի՝ իրենք նաև ծրագրում եմ «սվոփ»-ի շրջանակներում համագործակցություն ձևավորել Հայաստանի հետ:
«Եթե Հայաստանին հաջողվի հարևան պետություններից գազ գնել, մենք պատրաստ ենք մեր ծառայություններն իրականացնել»,- ասաց նա:
Tert.am-ի մեկ այլ դիտարկմանը, թե իրանական կողմը մշտապես հայտնում է պատրաստակամություն Հայաստան ներկրվող ծավալների մեծացման մասին, ի՞նչ ծավալների մասին է խոսքը, Իրանի դեսպանը պատասխանեց․
«Մենք պատրաստ ենք հարմար գներով գազ վաճառել Հայաստանի Հանրապետությանը: Այս հարցը քննարկվում է, և ես հուսով եմ, որ այս հարցում առաջընթացը շուտով կտեսնեք: Եթե Հայաստանը էներգետիկ ոլորտում մի քիչ աշխուժանա, ես կարծում եմ, որ շատ մեծ քայլեր կձեռնարկվեն, և դա կնպաստի Հայաստանում նոր աշխատատեղերի ստեղծվելուն»,- նշվեց Սաջադին:
Խոսելով «Մեղրի» ՀԷԿ-ի գործարկման հետաձգման մասին՝ դեսպանն ասաց, որ մեղավորն իրենք չեն։ «Մեղու ՀԷԿ-ը հունվարի վերջին պետք է գործարկվեր: Առաջիկայում Իրանից պետք է պատվիրակություն այցելի Հայաստան, որ փորձի նաև այս ծրագիը վերջնական տեսքի բերել: Ուշացման պատճառը մենք չենք եղել,- ասաց նա՝ հավելելով, որ մեղավորը ընկերություններն են՝ Հայաստանի կառավարությունն էլ մեղավոր չէ,- կառավարությունները միշտ լավ աշխատում են»:
Խոսելով արդեն Հայաստան-Իրան երկաթգծի կառուցման հնարավորության մասին՝ դեսպանը նշեց․ «Իրանի հարաբերությունները Հայաստանի հետ շատ լավ են, մենք պատրաստ ենք գործարկել երկաթգիծը: Հայկական կողմը պետք է աշխատի ներդրող կողմին ներկայացնել: Մենք պատրաստ ենք համագործակցել նաև Հյուսիս-հարավ մայրուղու ծրագրերի հետ կապված: Պարզապես պետք է համատեղ ներդրումներ իրականացնել այս ոլորտներում: Դուք առաջ եկեք, մենք հաջորդ քայլը կանենք»,- ասաց նա:
Դեսպանը նաև պատասխանեց նաև դիտարկմանը, թե Իրանը կարող է օգտվել Եվրասիական տնտեսական միությունում ՀՀ-ի անդամակցության հանգամանքից՝ նշելով, որ իրանական կողմը որևէ շոշափելի բան չի նկատել: «Եթե դուք նկատել եք, մեզ տեղեկացրե՛ք այդ մասին»,- դիմելով հարց տվողին՝ ասաց նա: