Փետրվարին Վրաստանն ու Եվրամիությունը կքննարկեն ասոցացման հարցերը
Վրաստան-Եվրամիություն ասոցացման հարցով խորհրդի նիստը կկայանա փետրվարի 5-ին Բրյուսելում, հայտնում է Грузия Online-ը՝ վկայակոչելով Վրաստանի հանրային հեռուստատեսությանը:
Նիստը նախագահելու է Եվրամիության արտաքին գործերի և անվտանգության քաղաքականության հարցերով գերագույն ներկայացուցիչ, Եվրահանձնաժողովի փոխնախագահ Ֆեդերիկա Մոգերինին:
Բրյուսել այցի ժամանակ Վրաստանի կառավարական պատվիրակությունը կգլխավորի երկրի վարչապետ Գեորգի Կվիրիկաշվիլին:
«Հանդիպմանը մանրամասն կգնահատվի ասոցացման մասին համաձայնագրի իրագործումը: Խոսակցություն կլինի մեզ համար կարևոր թեմաների շուրջ։ Դա է անվտանգությունը, հակամարտությունների թեման, անվտանգության վերաբերյալ երկխոսությունը, որը մենք սկսել ենք Եվրամիության հետ: Հանդիպումը բաղկացած է լինելու երկու մասից: Մեկը, այսպես ասած, դռնփակ փոքր հանդիպումն է, որտեղ տեղի կունենա ավելի գաղտնի երկխոսություն, և երկրորդ հատվածը, որտեղ արդեն ներկա կլինեն մասնակից պետությունները»,- հանրային հեռուստատեսությանը հայտարարել է ԵՄ-ում Վրաստանի դեսպան Նատալյա Սաբանաձեն:
Հանդիպմանը զեկույցով հանդես կգան Վրաստանի վարչապետը և ԵՄ-ի հետ ասոցացման մասին համաձայնագրի իրագործման գործընթացում ներգրավված պետական գերատեսչությունների ղեկավարները: