Ստամբուլի օդանավակայանի ահաբեկչությունը կազմակերպել էր Վրաստանի քաղաքացին
Թուրքիայում հայտնաբերվել ու ձերբակալվել է 2016 թվականին Ստամբուլի Աթաթուրքի անվան միջազգային օդանավակայանում իրականացված ահաբեկչական հարձակման կազմակերպիչներից Գոչա Սագնաձեն, այս մասին գրում է թուրքական «Միլլիյեթ» պարբերականը:
Աղբյուրը նշում է, որ ահաբեկչին կալանավորելու որոշում է կայացվել:
Չեչենական ծագումով Վրաստանի քաղաքացի ահաբեկիչը հարում է «Իսլամական պետություն» ահաբեկչական խմբավորմանը։ Հայտնի է, որ նա ամիսներ շարունակ թաքնվել է Տրապիզոնի նահանգի Օֆ շրջանում, որտեղ էլ նրան ձերբակալել են:
Հիշեցնենք, որ Աթաթուրքի անվան օդանավակայանում հարձակման ևս մի կազմակերպիչ՝ Ահմեդ Չաթաևը, ինքնասպանություն էր գործել ամիսներ առաջ Թբիլիսիում տեղի ունեցած հակաահաբեկչական հատուկ գործողության ժամանակ:
Ստամբուլի Աթաթուրքի անվան միջազգային օդանավակայանում ահաբեկչական հարձակումը տեղի էր ունեցել 2016 թվականի հունիսի 28-ին: Ահաբեկչության հետևանքով մահացել էր 28, վիրավորվել՝ 236 մարդ: