165 կալանավորված լրագրող, փակված հեռուստաալիքներ ու թերթեր. Էրդողանը շնորհավորել է թուրք լրագրողներին
Թուրքիայի նախագահ Ռեջեփ Թայիփ Էրդողանը Թուրքիայում լրագրողների օրվա կապակցությամբ շնորհավորել է գործող բոլոր լրագրողներին ու հայտարարել, որ լրագրողների անխոչընդոտ աշխատանքը ժողովրդավարական երկիր ունենալու ամենավառ ցուցիչն է:
Ինչպես գրում է թուրքական demokrathaber.org կայքը, Էրդողանը նշել է, որ Թուրքիայի նախորդ իշխանությունների օրոք մամուլը շատ ծանր օրեր է «քաշել», իսկ ինքն անձամբ պայքարել է լրագրողների ազատության համար:
«Լրագրությունը դա միայն լուրեր հայտնելը չէ, այլ նաև մեկնաբանություն տալն է: Ցավոք, ոմանք օգտագործելով խոսքի ու մտքի ազատության վերաբերյալ մեր ունեցած նրբանկատությունը՝ օգտագործում են այն ապատեղեկատվություն տարածելու ու մեր երկիրը պառակտելու համար», - ասել է Էրդողանը:
Թուրքական կայքն Էրդողանի հայտարարությունից հետո հիշեցրել է, որ անցած 2017 թվականի ընթացքում Թուրքիայում ամեն շաբաթ լրագրող է ձերբակալվել, իսկ այս պահին Թուրքիայի բանտերում շարունակում է կալանավորված մնալ 165 լրագրող:
Ընդհանուր առմամբ, 2017 թվականին Թուրքիայում ձերբակալվել է 187 լրագրող, 58-ը կալանավորվել են, նրանցից ազատ են արձակվել միայն 15-ը: Ազատազրկման և դրամական տույժի է ենթարկվել 81 լրագրող:
Բացի այդ՝ 18 լրագրող անցած տարվա ընթացքում հարձակման է ենթարկվել իր մասնագիտական գործունեությունն իրականացնելու պահին:
Անցյալ տարի Եվրախորհրդի խորհրդարանական վեհաժողովը մամուլի ազատության վերաբերյալ պահանջներ է ներկայացրել Թուրքիային: Եվրախորհրդի պատգամավորների դատին հանձնված զեկույցը, որն ընդունվել է 110 կողմ, 15 դեմ ձայների հարաբերակցությամբ, պահանջում է Թուրքիայից ազատ արձակել ահաբեկչական միջոցառումներին մասնակցելու մեղադրանքով ձերբակալված լրագրողներին, վերանայել Թուրքիայի քրեական օրենսգրքի «Թրքությունը վիրավորելու» մասին 301-րդ հոդվածը, ինչպես նաև «նախագահին վիրավորելու» մասին 229-րդ և «ժողովրդի մեջ ատելություն սերմանելու» մասին 216-րդ հոդվածները: Զեկույցը նաև կոչ է անում վերանայել համացանցի հրապարակումների վերաբերյալ մեղադրանքներն ու թուլացնել Թուրքիայի պետական հեռուստաալիքի նկատմամբ պետական վերահսկողությունը: