Թուրքիայում ձերբակալել են Գյուլենի ազգականին
Անկարայի ոստիկանությունը ձերբակալել է Սալեմ Գյուլենին՝ 2016 թվականի հուլիսին Թուրքիայում պետական հեղաշրջման փորձը կազմակերպելու համար մեղադրվող թուրք կրոնական քարոզիչ Ֆեթուլլահ Գյուլենի ազգականին: Այս մասին հայտնում է թուրքական NTV հեռուստաալիքը:
Հիշեցնենք, որ օրեր առաջ թուրք կրոնական քարոզիչ Ֆեթուլլահ Գյուլենը եգիպտական El-Yevm 7 պարբերականին տված հարցազրույցում հայտնել է, որ Թուրքիայի ընդդիմադիր գործիչների մի մասն իրականում աջակցում է նախագահ Ռեջեփ Թայիփ Էրդողանին:
Գյուլենը ևս մեկ անգամ ընդգծել է, որ եթե ԱՄՆ նախագահ Դոնալդ Թրամփը որոշում կայացնի արտահանձնել իրեն Թուրքիային, ինքը չի փախչի:
ԱՄՆ Փենսիլվանիա նահանգում բնակվող թուրք կրոնական քարոզիչը նաև նշել է, որ նա առաջարկել է Էրդողանին իր՝ հեղաշրջման փորձին առնչություն ունենալու հարցը քննել միջազգային անկողմնակալ որևէ կառույցի միջոցով, սակայն Էրդողանը չի ընդունել այդ առաջարկը: