Ուժեղ երկրաշարժ Ադրբեջանում, որն զգացվել է նաեւ Հայաստանում
Ադրբեջանի տարածքում երկրաշարժ է եղել 5,3 մագնիտուդ ուժգնությամբ։ Այն գրանցվել է ժամը 23:48-ին, Բարդա քաղաքից 20 կմ դեպի արեւելք-հարավ-արեւելք ընկած հատվածում։
ՀՀ ԱԻՆ մամուլի ծառայությունից հայտնում են, թե սույն թվականի նոյեմբերի 15-ին, տեղական ժամանակով ժամը 23:48-ին (Գրինվիչի ժամանակով` 19:48-ին) ՀՀ ԱԻՆ Սեյսմիկ պաշտպանության ծառայության սեյսմոլոգիական ցանցի կողմից գրանցվել է հյուսիսային լայնության 40.15 աստիճան եւ արեւելյան երկայնության 47.10 աստիճան աշխարհագրական կոորդինատներով (Ադրբեջան, Մինգեչաուր քաղաքից 68 կմ հարավ), օջախի 10 կմ խորությամբ, 5.3 մագնիտուդով երկրաշարժ:
Ստորգետնյա ցնցման ուժգնությունը էպիկենտրոնում կազմել է 7 բալ:
Երկրաշարժը զգացվել է Հայաստանի Հանրապետության գրեթե ողջ տարածքում: Հատկապես ցնցումներն ուժեղ են զգացվել Ստեփանակերտում եւ արեւելյան այլ բնակավայրերում: