Ժիրինովսկին ԼՂ հիմնահարցը համեմատել է Երուսաղեմի խնդրի հետ
ԼՂ խնդիրն Ադրբեջանի օրակարգում կլինի դեռ երկար տարիներ։ Այս մասին հայտարարել է Պետդումայում Ռուսաստանի Լիբերալ-դեմոկրատական կուսակցության խմբակցության ղեկավար Վլադիմիր ժիրինովսկին:
Ինչպես հայտնում է «Sputnik Ադրբեջանը», ելույթ ունենալով «Ինտեգրացիոն գործընթացները փոփոխվող աշխարհում» թեմայով քննարկմանը, Ժիրինովսկին հայտարարել է, որ ԼՂ խնդիրն «անլուծելի» է։ «Երբ մենք ասում ենք Ադրբեջան եւ Հայաստանը, մենք պետք է հասկանանք, որ նրանք ունեն տարածքներ, որտեղ հնարավոր չէ ոչինչ լուծել։ Չկա նման լուծում»,- ասել է նա։
Նրա խոսքով՝ երկու երկրներն էլ կարծում են, որ Ղարաբաղն իրենց տարածքն է։
«Մենք լավ ենք վերաբերվում Ադրբեջանին, սակայն տեսեք, թե ինչումն է ամենագլխավորը, դա ԽՍՀՄ-ի անօրինական տարրալուծումն է։ Դա միասնական երկիր էր՝ Ռուսական կայսրություն։ Ապօրինաբար այն փակեցին, ստեղծեցին ԽՍՀՄ։ Այնուհետեւ ապօրինաբար ԽՍՀՄ-ը լուծարեցին։ Պետությունը չի կարելի լուծարել, դա անհնար է։ Իսկ դա ահա արեցին։ Հետեւաբար, ամենուր պետք է լինի իրավական միջավայր»,- ասել է պատգամավորը։