3-րդ հայ գործարարի սպանությունը դրսում. Ուկրաինայում ընկերը սպանել է ֆաբրիկայի տնօրենին
Քիչ առաջ հայտնի դարձավ, որ երեկ` հոկտեմբերի 16-ին, Ուկրաինայի Ուժգորոդ քաղաքում հայ գործարար է սպանվել: Այս մասին հայտնում է Newsone հրատարակչությունը: Աղբյուրի տեղեկություններով՝ առավոտյան իր կաբինետում մի քանի կրակոցից սպանվել է «Ապարան» կոշիկի ֆաբրիկայի հայազգի տնօրեն Անդրանիկ Ն.-ն: Այս պահին կրակողը ձերբակալված է: Պարզվում են միջադեպի հանգամանքները: Ըստ իրավապահ մարմինների՝ այն տեղի է ունեցել անձնական կոնֆլիկտի ֆոնին:
Armtimes.com-ին հաջողվեց դեպքի վերաբերյալ մանրամասներ ճշտել Ուկրաինայի հայ համայնքի ղեկավար Նորիկ Գեւորգյանից: Վերջինիս փոխանցմամբ՝ «Ապարան» կոշիկի ֆաբրիկայի սեփականատիրոջը սպանել է ազգությամբ հայ տղամարդ, որի անունը Վարդան է: Վերջինս հանգուցյալի վաղեմի ընկերն է եղել:
«Դեպքը նրանց առօրյայի հետ կապված բան է, հայ համայնքի հետ ընդհանրապես կապ չունի, իրենց անձնական հարաբերությունների հետ է կապված եղել: Իրենք ընկերներ են եղել, միմյանց շատ վաղուց են ճանաչել, իսկ այստեղ երկուսն էլ գործարարությամբ էին զբաղվում: Ես նրանց երկուսին էլ գիտեի, նորմալ մարդիկ էին, բայց չեմ կարող ասել, թե պատճառն ինչ է եղել: Պարզ է, որ երեւի բիզնեսի հետ կապված տարաձայնություններ են ունեցել»,- armtimes.com-ին փոխանցեց համայնքի ղեկավարը:
Վարդանը եւ Անդրանիկը Ուկրաինա են տեղափոխվել դեռ 90-ականներին եւ այդ պահից երկուսն էլ կոշիկի արտադրությամբ են զբաղվել: Գեւորգյանի խոսքով` նրանց տարիքը 50-ից անց էր:
«Հիմա համայնքում ամեն ինչ նորմալ է, լարվածություն չկա»,- մեր զրույցը եզրափակեց Նորիկ Գեւորգյանը:
Հ.Գ. Սա վերջին 10 օրվա մեջ հայ գործարարի սպանության 3-րդ դեպքն է` այլ երկրում: Հոկտեմբերի 5-ին անհայտ անձը Մոսկվայի կենտրոնում կրակել էր 45-ամյա հայ գործարար Արսեն Փափազյանի վրա, իսկ հոկտոմբերի 16-ին կրկին Մոսկվայում սպանվել էր մեկ այլ` 44-ամյա հայ գործարար: