Սուտը կարելի է հայտնաբերել ըստ ձեռագրի
Իսրայելցի գիտնականները հայտնաբերել են, որ մարդու ձեռագիրը փոխվում է, երբ նա սկսում է ստել: Այս հայտնագործությունը ճանապարհ է հարթում նոր ստի դետեկտորների ստեղծման համար, որոնք ավելի ստույգ կլինեն, քան ներկայիններս, որոնք հիմնված են միմիկայի, ժեստերի, աչքերի շարժումների և ֆիզիոլոգիական ցուցանիշների վրա:
Հայֆայի Համալսարանի գիտնականները առաջարկել են 34 կամավորների գրել 2 տեքստ` մեկում նկարագրելով իրական պատմություն, մյուսում` հնարած: Գրելու համար կիրառվել է ComPET համակարգը`բաղկացած համակարգչային պլանշետից, անլար էլեկտրոնային գրիչից` սեղմումը չափող սարքով, և գրված տեքստը վերլուծող ծրագրից:
Փորձարկման հետևանքով պարզվել է, որ մտացածին պատմություններ գրելիս հետազոտման մասնակիցների ձեռագիրը ավելի խոշոր է եղել: Այս տարբերությունները անզեն աչքով չեն երևացել, միայն համակարգչի միջոցով է հնարավոր եղել նկատել:
Գիտնականների կարծիքով, ձեռագրի նման փոփոխությունները պայմանավորված են ուղեղի աշխատանքով, քանի որ ստելիս, այն ավելի լարված է աշխատում: Մասնագետները պատրաստվում են շարունակել հետազոտությունը: