Թուրքիայում ոստիկանական գործողություն է անցկացվել Ֆիննախի շենքում, կա ավելի քան 100 ձերբակալված
Անկարայում ոստիկանական հատուկ գործողություն է անցկացվել Թուրքիայի ֆինանսների նախարարության շենքում, այս մասին հայտնում է թուրքական «Միլլիյեթ» պարբերականը:
Նշվում է, որ խուզարկման ընթացքում ձերբակալվել է Ֆինանսների նախարարության ավելի քան 100 աշխատակից, նրանց թվում նաև բարձրաստիճան պաշտոնյաներ, որոնց անունները չեն հրապարակվում: Ձերբակալվածները կասկածվում են Թուրքիայում 2016թ.-ի հուլիսի 15-ի հեղաշրջման փորձի կազմակերպիչը համարվող թուրք կրոնական քարոզիչ Ֆեթուլլահ Գյուլենի «Հիզմեթ» շարժման հետ կապերի համար:
Այլ մանրամասներ առայժմ չեն հաղորդվում:
Հիշեցնենք, որ 2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին: