Շաբաթօրյակների անցկացումն ամոթալի է եւ անթույլատրելի
Երեւանի քաղաքապետարանում կայացած աշխատանքային խորհրդակցության ընթացքում Տարոն Մարգարյանը վարչական շրջանների ղեկավարներին եւ քաղաքային համապատասխան ծառայություններին հանձնարարել է նախապատրաստական աշխատանքներ տանել Երեւանի հիմնադրման օրվա՝ «Էրեբունի-Երեւան 2799» միջոցառումներին ընդառաջ՝ հոկտեմբերի 7-ին համաքաղաքային շաբաթօրյակ կազմակերպելու եւ այն համակարգված անցկացնելու ուղղությամբ, որի շրջանակում կմաքրվեն եւ պատշաճ տեսքի կբերվեն մայրաքաղաքի բակերը, այգիներն ու պուրակները, ինչպես նաեւ հանրային նշանակության կառույցներն ու ճանապարհների հարակից տարածքները:
Իսկ դուք ասում եք, թե ինչու լավ չենք ապրում: Ինչպես բարձրանա ժողովրդի կենսամակարդակը, եթե Տարոն Մարգարյանին, եւ ցանկացած այլ պաշտոնյայի թվում է, թե ինքը իրավունք ունի մարդկանց պարտադրել աշխատել իրենց հանգստյան օրը: Ավելին, ՀՀ բնակչության մեծ մասը նորմալ է համարում, որ իրենց կարող են աշխատացնել երբ ուզում են, կարող են հոտի նման քշել փողոցները մաքրելու կամ էլ հանեն գրանցման վայրից եւ տանեն բոլորովին այլ տեղում քվեարկելու:
Իսկ դուք ասում եք Հյուսիսային Կորեա: Կամ ինչ Հյուսիսային Կորեա: Հայաստանը սովորական միջնադարյան ֆեոդալական իշխանություն է:
Տարոն Մարգարյանը եւ նրա նման շատերը չգիտեն, որ մայրաքաղաքի բակերը պետք է մաքրվեն ամեն օր, եւ նրանք, ովքեր դրա համար վարձատրվում են, իսկ բակերը կեղտոտողները պարզապես պետք է տուգանվեն:
Երեւանի քաղաքապետարանում չգիտեն, որ հանրային նշանակության կառույցներն ու ճանապարհների հարակից տարածքները պետք է մաքրվեն ամեն օր, եւ նրանք ովքեր համապատասխան վարձատրություն են ստանում:
Որեւէ մեկը իրավունք չունի պետական եւ ոչ պետական հաստատությունների աշխատողներին, առավել եւս աշակերտներին եւ ուսուցիչներին զբաղվել հավաքարարի կամ բանվորի աշխատանքով:
Վերջ տվեք խորհրդային տարիների ավանդույթներից: Գլուխներդ բարձրացրեք եւ նայեք աշխարհին: Գտեք աշխարհում գոնե մեկ նորմալ երկիր, որտեղ շաբաթօրյակներ են անցկացվում: եթե գտնեք, ապա ամեն օր մարդկանց ձրի աշխատացրեք:
Top-News.am