Փարվանյանները Ապարանից պիտի դուրս գան, որ վիրուսը մաքրվի․ երեխեքը գնացին պատերազմ չզոհվեցին, եկան ստեղ՝ սպանեցին
Արագածոտնի փոխմարզպետ Էդգար Փարվանյանը, Նրա հորեղբոր որդին` Ռոման Փարվանյանը, հորաքրոջ որդին՝ Կարլեն Ղարիբյանը, ՔՊ-ական պատգամավոր Մաթևոս Ասատրյանը ու նրա եղբորորդին պիտի պատասխանատվության ենթարկվեն, մինչ այդ սակայն նրանցից, ովքեր որ ապրում են Ապարանում, այլևս չպիտի ապրեն այստեղ։ Այս մասին քիչ առաջ Ապարանի արյունալի դեպքերի հետ կապված իրականացվող բողոքի ակցիայի ընթացքում ասացին զոհվածների հարազատներն ու ծնողները։
«Փարվանյանները պետ է դուրս գան Ապարանից, որ էս վիրուսը մաքրվի, մենք չենք ուզում նոր սպանություններ լինեն: Մեր երեխաները կամավոր գնացին պատերազմ, եկան, որ էս մարդասպանները իրանց գլուխը ուտե՞ն»,- լրագրողներին ասաց սպանված Համիկ Միքայելյանի հորաքույրը։
«Ճիշտ ես, շատ ճիշտ ես, էս վիրուսը պիտի մաքրվի ստեղից, էլ ձև չկա»,- հավելեց հարազատներից մյուսը։