Էտի անվան տակ Երեւանի քաղաքապետարանը քաղաքը զրկում է թթվածնից
Այս թեմայով
- Ավագանու անդամներին մանդատից զրկելու ապօրինի գործողությունը կվիճարկվի դատարանում
- Երևանի ավագանու նիստը կքննարկի Հայկ Մարությանի և ավագանու այլ անդամների լիազորությունները վաղաժամ դադարեցնելու որոշումը
- Տարին սկսում ենք Նուբարաշենի աղբավայրի եւ երեւանյան տրոլեյբուսի հրդեհով
- 13-րդ մայրաքաղաքի քաղաքապետի պաշտոնին հավակնում են 13 քաղաքական ուժեր
Արդեն մի քանի տարի է աշնանը եւ գարնանը Երեւանի քաղաքապետարանը ծառերի էտի անվան տակ ծառերը, բառիս բուն իմաստով, զրկում է սաղարթից:
Երեւանի քաղաքապետարանում չգիտեն, որ ծառերը տնկվել են քաղաքը թթվածնով ապահովելու համար: Այնպիսի տպավորություն է, որ ինչ որ մեկը քաղաքի ծառերի փայտով բիզնես է անում:
Ի՞նչ իմաստ ունեն ծառերը, եթե տարին երկու անգամ նրանց զրկում են սաղարթից:
Արդեն մի քանի օր է Երեւանում կրկին արշավ է սկսվել ծառերի դեմ:
Քաղաքապետարանն ասում է, թե դրանք անհրաժեշտություն են: Բուսաբանական այգու փոխտնօրեն, անտառագետ, կենսաբանական գիտությունների թեկնածու Գագիկ Մովսիսյանը, կարեւորելով նմանատիպ սանիտարական աշխատանքների պարբերաբար անցկացումը, նշել է, որ դրանց անտեսումը հետագայում կարող է հանգեցնել առավել մեծ խնդիրների: «Ծառերի չորացած հատվածների վրա մեծ քանակությամբ միջատներ են հավաքվում, բազմաթիվ հիվանդություններ են առաջանում, ինչի արդյունքում ծառը դառնում է հիվանդությունների օջախ: Եթե համապատասխան միջոցներ ձեռք չառնվեն, հիվանդություններն ու վնասատուները կարող են տարածվել ամբողջ տարածքում»,- նշել է Գագիկ Մովսիսյանը:
Անտառագետին ընդամենը պետք է ասենք, որ քաղաքակիրթ աշխարհում շատ վաղուց հատուկ բուժանյութեր կան, որոնց օգտագործման դեպքում ծառերի ճյուղերը չեն չորանում, իսկ միջատների դեմ էլ ծառերը կտրելով չեն պայքարում: Իսկապես, 21-րդ դարը դեռ Հայաստան չի եկել:
Պատկերացնո՞ւմ եք, եթե Լոնդոնում կամ Մանչեսթերում ծառերի էտ անեին: Չեք պատկերացնում, քանի որ Անգլիայի, Ֆրանսիայի տարբեր քաղաքներում այնքան հաստաբուն եւ բարձր ծառեր կան, որ չեք կարող պատկերացնել, որ այդ ծառերը պարբերաբար զրկվել են սաղարթից:
Այնպիսի տպավորություն է, որ Երեւանի քաղաքապետարանը հատուկ պայքար է իրականացնում կանաչ տարածքների դեմ:
Top-News.am