Ինչո՞ւ է թանկացել բենզինը
ՀՀ Տնտեսական մրցակցության հանձնաժողովի կատարած դիտանցումների արդյունքում Հայաստանի բենզինի մանրածախ շուկայում վերջին օրերին դիտարկվել են գնային բարձրացումներ. մասնավորապես, ռեգուլյար տեսակի բենզինի մանրածախ վաճառքի գինը բարձրացել է նախ 10 դրամով եւ սեպտեմբերի 25-ին՝ եւս 10 դրամով: Այս մասին NEWS.am-ին հայտնեց ՀՀ Տնտեսական մրցակցության հանձնաժողովից: Հանձնաժողովի նախագահի խորհրդական Գայանե Սահակյանը:
«Արդյունքում 1 լիտր բենզինի մանրածախ վաճառքի գինը այսօր կազմում է 390-400 դրամ: Քանի որ նշված շուկայում առկա են գերիշխող դիրք ունեցող տնտեսվարողներ, ապա հանձնաժողովը ներկայումս հետեւում է շուկայում տեղի ունեցող զարգացումներին, եւ գնային փոփոխության պատճառը ինչպես նաեւ հիմնավորվածությունը գնահատելու նպատակով իրականացնում է ուսումնասիրություն:
Հանձնաժողովը տեղեկատվություն է պահանջել ոլորտում գերիշխող դիրք զբաղեցնող տնտեսվարողներից, ինչպես նաեւ ուսումնասիրվում են միջազգային շուկայի զարգացումները: Պահանջված տեղեկատվությունը տնտեսվարողներից ստանալուց հետո, ՀՀ մրցակցային մարմինը կպարզի, թե ինչն է փոխվել գնագոյացման շղթայում, որն էլ հանգեցրել է գնաճի»,-ընդգծեց Գայանե Սահակյանը: