Ռուսաստանից Հայաստան դրամական փոխանցումներն ավելացել են ռուբլու ամրապնդման հաշվին
Հուլիսին Հայաստանի ֆիզիկական անձանց դրամական փոխանցումների գումարն աճել է տարեկան կտրվածքով 29․5 միլիոն դոլարով կամ 20․3 տոկոսով ու կազմել 175․1 մլն դոլար։ Ընդ որում բացարձակ աճը հետեւյալ կերպ է բաշխվել՝ Ռուսաստանին է բաժին հասել գրեթե 18․5 միլիոն դոլարը՝ կամ 63 տոկոսը, իսկ մնացած երկրներին՝ 11․1 մլն դոլարից քիչը՝ 37 տոկոսը։
Չնայած Ռուսաստանի մասնաբաժինն տարվա ընդհանուր գումարում կրճատվել է 1 տոկոսային կետով, այն դեռ համեմատաբար բարձր է մնում՝ 65 տոկոս։ Հիշեցնենք, որ տարիներ առաջ այդ ցուցանիշը գերազանցում էր 80 տոկոսը, իսկ փոխանցումների բացարձակ գումարը ներկա ցուցանիշներից բարձր էր։
ԱՄՆ դոլարով փոխանցումներ անողների համար Ռուսաստանում իրավիճակը բարելավվել է։ Եվ այսպես հուլիսին դոլարի հանդեպ ռուբլին ամրապնդվել է տարեկան կտրվածքով գրեթե 8 տոկոսով։ Դրա արդյունքում ուղարկողները յուրաքանչյուր դոլարի համար ավելի քիչ ռուբլի են ներդրել , քան մեկ տարի առաջ։ Ըստ հաշվարկների, ռուբլու ամրապնդման գործոնն ինքնին ապահովել է Ռուսաստանից փոխանցումների գումարի աճ գրեթե 11 մլն դոլարով։
Մի շարք ռուսաստանցի մասնագետներ ռուբլու ամրապնդումը բացատրում են Ռուսաստանի տնտեսության դրական տեղաշարժերով, որոնք թույլ են տվել թուլացնել դրա փոխարժեքի կախումը նավթի համաշխարհային գներից։ Բացի դրանից նավթի համաշխարհային գները հիմա բավականին բարենպաստ են ռուսական արտահանման՝ հետեւաբար նաեւ ռուսական ռուբլու համար։
Տարեսկզբից մինչեւ հիմա (բացառությամբ հուլիսի) էտալոնային Brent տեսակի նավթի միջին ամսական ֆյուչերսային գինը գերազանցել է բարելի դիմաց 50 դոլարը։ Նաեւ հիշեցնենք, որ Ռուսաստանի դաշնային բյուջեում նավթի գինը ամրագրված է բարելի դիմաց «ընդամենը» 40 դոլարով։
Բայց ռուբլու փոխարժեքի հարցում առաջիկա հեռանկարը մի քիչ մշուշոտ է։ Ահա վերջին նորություններից մեկը՝ Նորվեգիայի կենսաթոշակային հիմնադրամը որոշել է վաճառել Ռուսաստանի դաշնային պարտաթղթերը՝ 2․9 մլրդ դոլարի չափով։ Վաճառքից հետո հիմնադրամը մտադիր է ստացված ռուբլին փոխադրել դոլարի, իսկ հետո դուրս բերել Ռուսաստանից։ Հասկանալի է, որ նման զանգվածային գործողությունը բացասական հետեւանքներ կունենա Ռուսաստանի արժույթի շուկայի վրա։
Բացի այդ՝ Նորվեգական հիմնադրամի օրինակին կարող են հետեւել նաեւ այլ արտաքին ներդրողներ, ինչը սպառնում է ռուսական ռուբլու լուրջ անկումով։ Ճիշտ է, հենց հիմնադրամին էլ ձեռնտու չի լինի գնել արդեն «թանկացած» ԱՄՆ դոլար։ Փորձագետների կարծիքով՝ հիմնադրամի շահերից է բխում Ռուսաստանի դաշնային պարտատոմսերի վաճառքի փուլային գործընթացը ՝ խուսափելով արժույթի ռուսաստանյան շուկայի համար ցնցումներից։