Նիկոլ Փաշինյանը ԳՇ պետ Օնիկ Գասպարյանին ազատելու հրամանագրի նախագիծը դարձյալ ուղարկել է նախագահին
Նիկոլ Փաշինյանը ֆեյսբուքյան էջում գրառում է արել՝ տեղեկացնելով, որ ԳՇ պետ Օնիկ Գասպարյանին ազատելու հրամանագրի նախագիծը դարձյալ ուղարկել է նախագահին։
Փաշինյանի գրառումը ներկայացնում ենք ստորև․
«Սիրելի հայրենակիցներ.
Հանրապետության նախագահը որոշեց ՀՀ ԶՈւ Գլխավոր շտաբի պետին պաշտոնանկ անելու հրամանագրի նախագիծը առարկություններով ետ ուղարկել վարչապետի աշխատակազմ:
Այս որոշումը ամենեւին չի նպաստում ստեղծված իրավիճակի հանգուցալուծմանը:
Ես սահմանված կարգով ԳՇ պետին պաշտոնանկ անելու միջնորդությունը կրկին ուղարկում եմ Հանրապետության նախագահին՝ ակնկալելով, որ այն սահմանված կարգով կստորագրվի:
Մնացածը՝ ինչպես նախօրեին պայմանավորվեցինք Հանրապետության հրապարակում»:
Հիշեցնենք, որ ավելի վաղ նախագահ Արմեն Սարգսյանը իր սահմանադրական լիազորությունների շրջանակում, առարկություններով վերադարձրել է հրամանագրի նախագիծը: